Du kan ikkje vere ekspert før du har byrja. Pågangsmot og vilje til å kaste seg ut i ting som først kjennest noko utrygt, har hjelpt Stine Sem Kristoffersen til å ta videreutdanning.

Stilling: Vatn- og avløpsingeniør i Structor Vestfold

Utdanning:

• Bygningsinformasjonsmodellering (BIM) ved NTNU, 2021 - 2022
• Byggingeniør ved Høgskolen i Telemark, 2010 - 2013

Bli medlem i Alumni du også!

- Tilværet som vidareutdanningsstudent er hektisk, men fint. Eitt av goda er at ein får eit stort nettverk. Eg har hatt stort utbytte av nettverket i jobben, i tillegg er det hyggeleg å bli kjend med andre med same interesser, seier Stine Sem Kristoffersen.

Dei siste åra har ingeniøren, som jobbar med vatn og avløp ved bedrifta Structor Vestfold, kvart semester teke eit eller fleire emne i den erfaringsbaserte mastergrada i veg og jernbane.

Set pris på fleksibilitet

Sem Kristoffersen meiner at noko av det viktigaste ho har lært som vidareutdanningsstudent er evna til å prioritere: å kunne sjonglere tida mellom full jobb, små barn og studiane.

- Ein må vere til stades i det ein driv med der og då, då blir ein òg meir effektiv.

Kvar veke lagar ho studieplanar for å få ei god oversikt over når ho kan setje av tid til å studera. For å få mest mogleg utbytte av forelesingane, førebur ho seg godt og prøver å vere så aktiv som mogleg.

- Hadde det ikkje vore for at studieløpet er så fleksibelt og at ein sjølv kan velja kor mange emne ein vil gape over kvart semester, hadde eg ikkje kunna gjort det, seier Sem Kristoffersen, som fleire gonger nemner kor stor pris ho set på fleksibiliteten i utdanningsopplegget. Planen er å ha mastergrada på plass mot slutten av 2023.

- Ikkje stress med å ta ein mastergrad

Mange studentar er opptekne av å bli ferdige med utdanninga så fort som mogleg og tek mastergrad like etter bachelor. Sem Kristoffersen trur ikkje at det finst berre éi oppskrift på kva som er best, men erfaringa hennar er at det kan vera lurt ikkje å ta alt i ein jafs.

- Eg trur det kan vere lurt å jobba ein periode etter at ein har teke bachelor. Då får ein et klarare bilete av kva ein eigentleg vil og kva som engasjerer ein. 

Ein fordel ved å ta ein erfaringsbasert mastergrad er moglegheita for å bruke den nye kunnskapen samtidig som ein er i jobb, meiner ho. Ho synest òg at det er lettare å knyte teori opp mot praksis når ein har arbeidserfaring. Då ho byrja å studera like etter vidaregåande, syntest ho ikkje det var like lett å forstå samanhengane og nytten i det ein lærte.

Samarbeid er tingen

Store delar av studietida til Sem Kristoffersen har vore digital på grunn av pandemien, og ho har sakna det å kunna vera på samlingar og møte andre. I nokre av faga har dei likevel fått danna små grupper og møttest på Teams for å diskutere oppgåver og innleveringar. Sem Kristofferesen trur nemleg at for å lykkast, både i studiar og jobb, er samarbeid vegen å gå.

- Du kan få til mykje åleine òg, men som eit team stiller ein sterkare fordi ein får eit breiare perspektiv og har betre erfaringsgrunnlag. Noko av det viktigaste eg har lært i arbeidslivet, er at ein kan få til det meste berre ein samarbeider og spel kvarandre gode.

Les mer om studiet for Bygningsinformasjonsmodellering

Klimaendringane krev nye løysningar

Meir ekstremnedbør og flaum er av dei største konsekvensane av klimaendringane i Noreg. Som vass- og avløpsingeniør ved Structor Vestfold jobbar ho mykje med å oppgradere vass- og avløpssystemet for kommunar slik at det skal tole endringane.

- Me jobbar med infrastrukturprosjekt som har mål om å halde dei neste 100 åra. Det er kjekt å vere med å forme infrastrukturen rundt oss, å lage løysingar som har mykje å seia for samfunnet både her og no og i framtida, seier Sem Kristoffersen.

Lagar grøne oasar

Men det er ikkje berre røyr og betong ho sysselset seg med.

- Det handlar om å bruke alt dette vatnet til noko positivt. Me jobbar òg med å skape grøne oasar og opne bekkar og vassvegar i ein elles asfaltprega by, det er gøy.

-  Kvar er du om fem år?

- Om fem år håper eg at eg framleis får vere med og lage overvassplanar for norske kommunar, og å prosjektere utbygging av nye bustadfelt og nye samferdselsprosjekt i både liten og stor skala, seier Sem Kristoffersen.

Tekst: Lisbet Jære