Du som får anteken bidrag, vert invitert til eit digitalt møte med praktisk informasjon og gjennomgang av det tekniske. Der kan du stille spørsmål og prøve i praksis det du skal gjere på konferansen
Før konferansen får du ein kontaktperson frå programrådet vårt som skal vere ansvarleg for din sesjon. Du kan kontakte vedkommande viss det er noko du vil avklare før sjølve dagen.
Skal du syne film, spille av lydklipp eller gjere noko anna spesielt? Kontakt oss i forkant, så vi er sikre på at det går sømlaust på dagen. Du kan også prøve dette under møtet nemnt over.
Tenk gjennom korleis du skal aktivisere deltakarane. Sjå tips lenger ned.
For å vere med i Zoom-møtet er det naudsynt for alle deltakarar å registrere seg, også du som skal presentere. Det tek berre eit halvt minutt, og lenke kjem i god tid før konferansen. Du kan registrere deg når som helst fram til konferansen er over. Einaste måten å få tilgong til møtet er via lenka du får tilsendt etter registrering.
Under konferansen
Både du og sesjonsansvarleg må møte opp minst eit kvarter før sesjonen startar. Då har de litt tid til å gå gjennom det praktiske. Vi lagar eit grupperom (breakout room) som ein slags backstage. Teknikar sender deg og sesjonsansvarleg inn der så de kan snakke saman utan at publikum er til stades. Her kan du også få hjelp av teknikar, og du kan teste lyd, bilete og eventuelt anna.
Hugs at du har totalt 20 minutt på deg, og minimum ti minutt skal vere deltaking frå publikum.
Sesjonsansvarleg vil introdusere og runde av sesjonen din. Hen kan også hjelpe deg å passe tida og følgje med i chatten undervegs.
Tips til ei god digital økt
Koble deg opp i god tid før sesjonen startar, gjerne 15 minutt.
Tenk gjennom korleis du skal få til ein god diskusjon.
Planlegg aktivitetar som engasjerer deltakarane undervegs.
Avslutt til riktig tid.
Sørg for god lyd, test mikrofonen på førehand.
Ver bevisst på kameravinkel og lys. Unngå å ha ein lyskilde rett bak deg, og prøv å ha kameraet nokonlunde i augehøgde.
Tenk gjennom kva for grep du kan ta for at bidraget ditt skal bli generaliserbart og dermed interessant for folk frå andre fagområde.
Hugs at ti minutt går fort, så vurder nøye kor viktig det er å fortelje om bakgrunnen for prosjektet, og kor mykje det er naudsynt å seie om de sjølve.
Døme på aktivisering av deltakarane
Viss du skal snakke om eit verktøy du har prøvd, kan du gjerne aktivisere deltakarane ved å ta i bruk verktøyet i økta di.
Viss du skal ha eit foredrag og ein etterfølgjande diskusjon, kan du sjølv førebu spørsmål. Desse kan du nytta til å sparke i gong diskusjonen, eller du kan ha dei i bakhand i fall diskusjonen går trått.
Viss du skal presentere resultat frå forsking, kan du bryte opp økta med å spørre deltakarane kva dei trur resultatet vart, før du presenterer det.
Viss du stiller spørsmål til deltakarane, kan dei anten svare individuelt via chatten eller ved å ta ordet.
Presentasjon, opptak og opphavsrett
Vi tek opp alle sesjonane for å publisere dei ope (viss du har samtykka til dette). Dette inneber at alt innhald du presenterer må vere innanfor lov om opphavsrett.
Hugs å sende inn presentasjonen viss du har samtykka til at vi kan dele han på nettstaden. Det er ditt ansvar å sørgje for at materialet i presentasjonen er innafor lov om opphavsrett.
