Visste du ikkje at det heng eit bilete av Andy Warhol på NTNU? Det er du sikkert ikkje åleine om, og det har Eigedomsavdelinga tenkt å gjere noko med.

NTNU si kunstsamling i Fotoware

I regi av Seksjon for bygningsdrift i Eigedomsavdelinga, er det no sett i gang eit stort prosjekt med å registrere alle 1000+ kunstverk som finst i NTNU sine lokale og uteområde. Det er inngått ein rammeavtale med firmaet KUVE, som saman med medarbeidarar i Eigedomsavdelinga skal registrere og fotografere alle kunstverk på NTNU. Det skal lagast retningslinjer for bl.a. reinhald, vedlikehald og flytting av kunstverka, slik at vi sikrar at vi tek godt vare på alle verdiane som er i lokala våre.

Gjere kunsten mer tilgjengeleg

Det er sikkert mange som blir overraska over kor mykje kunst vi har på NTNU sin campus. Når alle kunstverk er registrerte, er ambisjonen å gjere informasjonen om kunstverka tilgjengeleg for alle interesserte. Ei løysing kan vere ein QR-kode som gjev deg all informasjon om biletet eller skulpturen du står og ser på. Idear om eigne nettsider og "digitale utstillingar" er også på blokka.

I tillegg til tilgang, er lagring av kunstverk viktig. Det skal derfor etablerast eit sentralt lager der alle kunstverk som ikkje har ein stad å henge, blir lagra i samsvar med forskrift. Verka blir også gjort tilgjengelege via ein database, slik at miljø på NTNU kan bestille kunstverk montert i lokala sine. 

NTNUs Kunstforum

Veit du noko vi ikkje veit?

Det finst mange kunstverk på NTNU som har vorte lagra, og kanskje gløymde. Desse vil vi gjerne vite om, slik at vi får registrert og lagt ein plan for vedlikehald av alle kunstverk.

Veit du om noko? Legg det inn i e-vaktmeister, så tek vi kontakt! Dette gjeld også om du har god oversikt over, eller eit brennande engasjement for, kunsten på NTNU, og har lyst til å bidra med informasjon i dette prosjektet.