I anledning 20-årsjubileet til Den Unge Scenen (DUS) i 2024 samarbeider DUS og NTNU om eit forskingsprosjekt som vil bidra til å auke kunnskapen om DUS og ungdomsteater i Noreg, så vel som ny, norsk dramatikk.

DUS vart oppretta i 2004 og er eit landsdekkande prosjekt som jobbar for å heve nivået på ungdomsteater i Noreg. DUS bestiller og utviklar sceniske tekstar og konsept for ungdom som blir framført av ungdom i alderen 13 til 19 år.

Sidan oppstarten har DUS fått fram 42 nye tekstar og konsept. Om lag 80 ungdomsgrupper fordelt over heile landet lagar framsyningar av tekstane i kvar runde som blir viste på festivalar i alle deltakande regionar og ein landsdekkande festival på Det Norske Teatret i Oslo for utvalde grupper.

Forskingprosjektet DUS har sitt utgangspunkt i drama- og teatermiljøet på NTNU. Arbeidet blir leia av førsteamanuensis Ine Therese Berg, som er prosjektleiar og redaktør. Med seg som redaktør har ho førsteamanuensis Lene Helland Rønningen. Prosjektet har som mål å gi ut ei vitskapleg artikkelsamling med utgiving i 2025. Etter ein open call er til saman 12 forskarar med ulik bakgrunn tilknytt prosjektet. Forskingbidraga vil ha ei sterk empirisk forankring i DUS, og vil gi kunnskap om tema som organisering og struktur, instruktørrolla, eit blikk på dei dramatiske tekstane, konseptet «blanke ark (open oppgåve), mangfald i DUS, og meir.